گوگل میں آرٹی فیشل انٹیلی جنس (اے آئی) پر مبنی سرچ لائیو فیچر کو آئی او ایس اور اینڈرائیڈ ڈیوائسز کے لیے متعارف کرا دیا گیا ہے۔
گوگل ایپ میں یہ فیچر فی الحال امریکا میں صارفین کو دستیاب ہوگا جو کہ بنیادی طور پر اے آئی موڈ کا حصہ ہے۔ یہ جیمنائی لائیو جیسا فیچر ہے جو گوگل ایپ کے اندر موجود ہے۔ گوگل کی جانب سے جاری بیان میں بتایا گیا کہ جیمنائی لائیو کی طرح آپ سرچ لائیو میں بھی آڈیو چیٹ کرسکتے ہیں۔
اس کے لیے گوگل ایپ اوپن کریں اور وہاں نئے لائیو آئیکون پر کلک کریں اور پھر جو سوال ذہن میں ہو وہ زبان سے دہرائیں۔ ایسا کرنے پر گوگل کی جانب سے اے آئی جنریٹڈ آڈیو میں جواب دیا جائے گا، جبکہ آپ ایک کے بعد ایک سوال پوچھ سکیں گے۔
کمپنی کے مطابق یہ فیچر ایسے افراد کے لیے بہترین ثابت ہوگا کہ گاڑی میں سفر کر رہے ہوں یا ملٹی ٹاسکنگ میں مصروف ہوں۔ یہ چیٹ کسی اور ایپ کے اوپن کرنے پر بھی جاری رہے گی اور آپ گوگل کے جوابات کو تحریری شکل میں بھی دیکھ سکیں گے، جس کے لیے ٹرانسکرپٹ آپشن دستیاب ہوگا۔
اے آئی موڈ ہسٹری میں آپ مخصوص جوابات کو دوبارہ دیکھ سکیں گے اور ان پر گوگل سے مزید چیٹ کرسکیں گے۔ امریکا سے باہر یہ فیچر کب تک صارفین کو دستیاب ہوگا، یہ کمپنی کی جانب سے واضح نہیں کیا گیا۔
البتہ یہ ضرور بتایا گیا کہ آنے والے مہینوں میں سرچ لائیو کو مزید بہتر بنایا جائے گا۔
