فواد خان اور ماہرہ خان کے مداحوں کے لیے خوشخبری ہے کہ ان کی رومانوی فلم ’’نیلوفر‘‘ رواں سال موسم سرما میں سینما گھروں میں پیش کی جائے گی۔
فلم کی شوٹنگ کافی عرصے سے جاری تھی اور ریلیز کی تاریخ واضح نہیں تھی، لیکن اب یہ فلم اس موسم سرما میں سنیما اسکرینز پر پیش کر دی جائے گی۔
فلم کے حوالے سے اداکاروں اور فلم سازوں نے انسٹاگرام پر ایک پوسٹ میں لکھا کہ “اگلی ملاقات کا انتظار رہے گا، نیلوفر، اس موسم سرما۔”
گزشتہ سال جون میں فواد خان نے ایک تقریب کے دوران بتایا تھا کہ فلم ’’نیلوفر‘‘ تقریباً شوٹنگ کے آخری مراحل میں ہے اور یہ ان کی آنے والی نئی فلم ہے۔
کورونا وبا کی وجہ سے 2020 میں کئی منصوبے تاخیر کا شکار ہوئے تھے جن میں یہ فلم بھی شامل تھی۔ ماہرہ خان نے ایک انٹرویو میں بتایا تھا کہ شوٹنگ مکمل ہونے میں صرف 10 دن باقی تھے لیکن کووڈ کی وجہ سے سب کچھ رک گیا۔ بعد ازاں جیسے ہی فلم کی شوٹنگ ختم ہوئی، ماہرہ خان نے انسٹاگرام پر شوٹنگ کے دوران کھینچی گئی تصاویر شیئر کرتے ہوئے مداحوں کو بتایا کہ فلم کی عکس بندی مکمل کر لی گئی ہے۔ انہوں نے پوسٹ میں ذکر کیا کہ ’’نیلوفر‘‘ کی پوری ٹیم نے فلم کو شاندار بنانے کے لیے ان تھک محنت کی ہے۔
اگرچہ ’’نیلوفر‘‘ کی کہانی کے بارے میں زیادہ تفصیلات نہیں بتائی گئیں، تاہم ماضی میں ماہرہ خان نے اشارہ دیا تھا کہ فلم کی کہانی رومانوی نوعیت کی ہے۔ فلم کی کہانی امر رسول نے لکھی ہے اور وہی فلم کے ہدایتکار بھی ہیں، جبکہ اسے اوصاف شارق نے پروڈیوس کیا ہے۔
