قومی ٹی ٹوئنٹی ٹیم کے کپتان سلمان آغا نے بنگلادیش کے خلاف سنسنی خیز مقابلے میں 11 رنز سے کامیابی کے بعد گفتگو کرتے ہوئے کہا کہ ٹیم کو بخوبی علم ہے کہ فائنل میں کیا کرنا ہے اور وہ مکمل طور پر تیار ہیں۔ ان کا کہنا تھا کہ اگر آپ اس طرح کے میچز جیتیں تو یہ ظاہر کرتا ہے کہ آپ ایک خاص ٹیم ہیں۔ انہوں نے مزید کہا کہ بولرز نے شاندار باؤلنگ کی اور فیلڈرز نے بھی بہترین کارکردگی دکھائی۔ سلمان آغا نے شاہین آفریدی کی تعریف کرتے ہوئے کہا کہ انہوں نے آغاز سے ہی حریف ٹیم پر دباؤ ڈالا، جس کا ٹیم کو بڑا فائدہ ہوا۔
قابل ذکر بات یہ ہے کہ ایشیا کپ کی 41 سالہ تاریخ میں پہلی مرتبہ پاکستان اور بھارت اتوار کے روز فائنل میں آمنے سامنے ہوں گے۔ شائقین کرکٹ 28 ستمبر کو پہلی بار ایشیا کپ کے فائنل میں پاکستان اور بھارت کو کھیلتا دیکھیں گے۔ موجودہ ایونٹ میں دونوں ٹیمیں دو بار مقابلہ کر چکی ہیں اور دونوں بار بھارت کو کامیابی ملی ہے۔ 1984 سے کھیلے گئے ایشیا کپ کے 16 ایڈیشنز میں یہ پہلا موقع ہے کہ پاکستان اور بھارت ایک ساتھ فائنل میں پہنچے ہیں۔ بھارت سب سے زیادہ 8 بار ایشیا کپ جیت چکا ہے، سری لنکا نے 6 بار اور پاکستان نے 2 بار ٹرافی اٹھائی ہے۔
